Mintzalagunaren aurtengo edizioa berritasunekin dator
Egitasmoa sare sozialetan murgilduko da aurten, talde desberdinetako partaideen arteko harremanak bultzatzeko
- IÑIGO MORONDO | IRUN.
Irundar guztiek ez dituzte nahi lituzketen aukerak euskaraz egiteko. Batez ere, hizkuntza ikasten ari direnak dira, askotan, praktika egiteko testuinguru erosoa aurki-tzen ez dutenak. Hori dela eta jaio zen, aspaldi, Mintzalaguna programa. Bertan, 'mintzalagun' batekin, hau da, euskararen erabileran trebea den pertsona batekin, biltzen dira 'mintzakideak', hizkuntza erabiltzeko gura edo beharra dutenak. «Urtetan, eta bereziki iaz, arrakasta izan duen egitasmoa da hau. Ilusio eta gogo handia jartzen dugu, baita aurten ere, aurrera ateratzeko», azaldu zuen atzo Euskara arloko udal ordezkaria den Fernando San Martinek.
2014-2015 Mintzalaguna programaren aurkezpena egiteko, antolakuntzan parte hartzen duten hiriko hiru euskaltegietako zuzendariekin agertu zen zinegotzia: Enara Zubeldia (Bidasoako AEK), Jaione Campo (Udal Euskaltegia) eta Gema Urtizberea (Herri Jakintza).
«Mintzalagunen inplikazioa, haiek gabe ezin izango litzateke egitasmoa aurrera atera, eta mintzakideen gogoak, irailaren lehenatik deika hasi baitira noiz hasiko garen galdezka, azpimarratuko nahi nuke», adierazi zuen Jaione Campok. Bai lehenengoen baita bigarrenen jarrerek eta iazko ikastaroan jasotako datuek («12 talde eta 89 lagun euskaraz mintzatzen») gauzak «ondo egiten ari garela pentsatzera eramaten gaituzte», zioen. Ez dira horretan geldituko antolatzaileak eta aurten aurrera pausuak eman nahi dituzte «partaide kopurua handitzeko».
Bi berritasun aipatu zituen Campok. Alde batetik, euskaltegiren batean edo Hizkuntza Eskolan ez dauden mintzakide izateko apuntatzen direnei «elkarrizketatxo bat egingo zaie maila minimo bat dutela ziurtatzeko». Bestetik, sare sozialetara salto egingo du Mintzalaguna programak, «momentuz, Facebookera. Talde ezberdinetan dauden partaideek harremana izan dezaten aukera hori eskeini nahi dugu».
Gainera, Bidasoa Txingudi Mugazgaindiko Partzuergoak antola-tzen duen Gugeu programarekin (helburu berdina bilatzen duena baina eskualdeko hiru hizkuntzetan) «koordinatuko dugu lana» emaitza hobeen bila.
«Esperientzia polita»
Zinegotziarekin eta euskaltegietako zuzendariekin batera, Miren Oloaskoaga egon zen, iaz mintzalagun lanetan estreinatu zena. «Euskaltegian ikasle nintzela, mintzalagun bezala sartzea proposatu zidaten. Esperientzia polita izan zen, benetan ederra», adierazi zuen. «Egia da lehenengo egunean pixkat lotsati geundela taldeko zortzi kideak, baina denbora pasa hala, harreman oso politak sortu ziren. Ez da batere zaila: larunbatero, goizean, ordu eta erdi biltzen ginen San Juango taberna batean kafetxo bat hartzeko eta hitzegiteko. Lehenengo eguna izan zen gaia jarri behar izan nuen bakarra. Egunerokoak, albisteak, ikusitako pelikularen bat, herrian gertatutakoak, Udalak egindako gauzak... Horrelako gauzei buruz hitzegiten genuen, koadrila bat bezala, eta nire lana guzti hura koordinatzea zen, eta ixilik gehiegi zeramanari hitzegitera animatzea. Benetan gomendatzen dut. Norberaren mailak ez du horrenbesteko garrantzirik, asko ikasten da; kriston aldea dago hasierako eta bukaerako mailaren artean. Jendea parte har-tzera gonbidatu nahiko nuke», luzatu zuen Olaskoagak.
Parte hartze hori «dohainik» dela gogoratu zuen San Martinek. «Izen ematea, hilaren 19a, igandea, baino lehen, www.irun.org/euskera web orrian egin behar da. Norbait moldatzen ez bada, euskaltegietan eska dezake orria eta SAC-HAZen aurkeztu dezake», esan zuen Campok.
No hay comentarios:
Publicar un comentario