Noticia publicada en Diario Vasco sección Bidasoa,el viernes día 10 de Abril de 2015.

Bilduk 300 ekarpenetik gora jaso ditu herri programarako

• J. OCHOTECO
 
• IRUN

10 abril 201500:08

Bildu udal taldeak atzo aurkeztu zituen bere herri programa osatzeko martxan jarri duen prozesuaren lehen emaitzak. Jokin Melida zinegotziak «programa herrikoia» bezala definitu zuen Bilduren proposamena, eta «gizarteratze» fasearen hasieraren berri eman zuen.

Herri programa prestatzeko udal taldeak bi bide erabili ditu: alde batetik, «hiru bilera presentzial» burutu ditu Bilduk, eta bertan «lan taldeak osatu eta 21 arlo desberdin landu» zituzten partaideek, azaldu zuen Jokin Melidak. Beste aldetik, «web orri bat jarri genuen martxan» herritarren proposamenak ezagutzeko. Web orri honek «200 bisitatik gora jaso ditu», eta «programan ere txertatu ditugun ekarpen asko jaso ditugu».

Bilera presentzialetan eta web orrian jasotakoak batuz, «300 ekarpenetik gora jaso ditugu. Hori zen guk hasieran genuen helburuetako bat: programa herriak osatzea», azpimarratu zuen Melidak. Ekarpen hauetatik «224 proiektu zehatz atera ditugu, 91 ildo nagusietan banatutak».

30.000 aldizkari banatzeko

Programa osatzeko lehenengo fase honen balorazioa «oso, oso positiboa eta emankorra da. Hemendik aurrera geratzen zaiguna da orain arte egin dugun lan hori gizarteratzea, jendearengana iristea». Helburu hau lortzeko, «lan horren balorazioa aldizkari batean aurkeztuko dugu. Gure lehentasunak ezagutzera emango ditugu bertan», zehaztu zuen Jokin Melidak. Aldizkari honen 30.000 ale buzoneatuko dira datozen egunetan.

Melidak aurreratu zuenez, «EH Bildu Bira ere egingo dugu: gure proiektu nagusia ezagutzera emateko helburuarekin, auzoz auzo eta plazaz plaza joango gara gure ekintza izarrak aurkezten».