Denontzat gimnasioa, Irungo Udalaren laguntzarekin, kirol proposamen berria antolatu du asteburu honetarako. Denontzat Race izenpean, mundu guztiarentzat diseinatutako oztopo-lasterketa bat izango da. Hitzordua, larunbat arratsaldean izango da, 15.30etik aurrera, San Juan plazan. Proba hiru kilometroko zirkuitua izango da, Irungo Udalean hasi eta amaituko da, eta Gain Gainean parkea eta Karrika Nagusia zeharkatuko ditu. Parte-hartzaileek 26 oztopo izango dituzte bidean, eta hormak, enborrak, soka bertikalak eta rokodromoak gainditu beharko dituzte, besteak beste. Bi modu daude parte hartzeko, adinaren arabera. Helduek hiruko taldeak osatuko dituzte, eta kronoak.com webaren bidez eman beharko dute izena. Umeek, berriz, bakarka egingo dute korri, eta Irungo eta Hernaniko gimnasioetan izena eman ahal izango dute. Ekitaldia 2022ko Europako Mugikortasun Astearen programazioan sartu da. – J.G.