Noticia publicada en Diario Vasco,el jueves día 26 de Noviembre de 2020.

Irun Udal Euskaltegiak abian jarriko du urtarrilean Lannahi programaren 2. txanda

M.A.I.IRUN.Jueves, 26 noviembre 2020, 00:18

Irungo Udal Euskaltegiak Lannahi programaren bigarren txanda abian jarriko duela ezagutarazi du Irun Udalak. Langabezia egoeran dauden pertsonei begirakoa da programa eta haren bitartez euskara debalde ikasteko aukera ematen zaie. Bigarren txandako ikastaroa urtarrilaren 7an hasi eta martxoaren 26an bukatuko da.

Ikastaroak, printzipioz, aurrez aurreko eta urrutiko jarduna uztartuz eskainiko dira. Ikasle eta langileen segurtasuna eta osasuna bermatzeko beharrezkoak diren prebentzio neurriak hartuko dira eta izena emandako ikasle kopuruaren arabera, beharrezkoak diren egokitzapenak egingo dira.

Udalak programa honen bost txanda eskainiko ditu 2020-2021 ikasturtean: 3 ikasturtean zehar eta 2 udan. Ikasturtean zehar goizeko txandetan izena ematen dutenek lau orduz arituko dira euskara ikasten eta arratsaldeko txandetan, aldiz, hiru orduz. Udan, ordea, lau ordu arituko dira goizez.

Lannahi programan izena eman nahi dutenek izen-ematea internetez egin beharko dute 2. txandarako, azaroaren 30etik abenduaren 10erako epean, SAC24h zerbitzuaren bitartez Irun Txartela edo beste ziurtagiri digital batzuk erabiliz (NA elektronikoa, Izenpe txartela...) eta hori ezinezkoa bazaie, HAZeko autozerbitzu terminaletan (San Martzial kalea, 2) egin ahalko dute matrikula egunero 8.00etatik 22.00etara.

Eskaria internetez egiteaz gain, mailaketa proba egin behar da, Udal Euskaltegian ari direnen edo aurreko ikastaroan aritu direnen kasuan izan ezik. Mailaketa proba egiteko 943 505 273 telefonora deitu behar da hitzordua eskatzeko.

Parte hartu ahal izateko, baldintza hauek bete behar dira: Lanbiden lan eskatzaile bezala inskribatua egon eta langabezian egon edo lanean egonda ere jardunak jornadaren %50a ez gainditzea.