Noticia publicada en Bidasoko HITZA, el lunes día 13 de Julio de 2026.

Gizartea

Ekialdebuseko langile baten kontrako erasoa salatu du LABek

Ekialdebus-LABetik gaitzespen eta salaketa irmoena adierazi dute, eta jakinarazi ez dela "zoritxarrez" gertaera isolatua.

Ikerne Zarate Gartziarena

Hondarribia,Irun

2026/07/13

Ekialdebus zerbitzuko autobus gidari batek erasoa jasan duela salatu du Ekialdebuseko LABek. Gaitzespen eta salaketa irmoena adieraztearekin batera, babesa azaldu diote bere lanpostuan zegoela erasoa jaso duen lankideari, “langilea, mozkor egoera nabarmenean zegoen pertsona batek eraso du, lankidea bere eginkizunak betetzen ari zen bitartean”. Atzo (hilak 12, igandea) izan ziren gertakariak sindikatuak azaldu duenez, “erabiltzaile batek ero moduan kolpatu zuen autobusaren babes manpara eta Udaltzaingoak esku hartu behar izan zuen”. Erasoak izandako eraginarengatik, langilea zerbitzutik ordezkatu behar izan zuten.

Kezka eta nazka azaldu dute Ekialdebuseko LAB sindikatuko langileek, ez baita gertakari isolatua: “Zoritxarrez kezka eta nazka handiz ikusten ari gara garraio publikoko langileen aurkako irainak, mehatxuak eta eraso fisikoak gero eta ohikoagoak direla”.

Argi esan dute, plantillaren osasun fisiko eta psikologikoa negozia ezina dela, “herritarrei zerbitzua emateak ezin du ekarri berekin erasoak jasateko arriskua”, eta eskaera zehatzak egin dizkiote horren harira Ekialdebuseko zuzendaritzari: erasoa jasan duen lankideari arreta eta laguntza psikologikoa, medikua eta juridikoa emateko protokoloak berehala aktiba ditzala;  autobusetan indarrean diren segurtasun neurriak premiaz berrikusi eta indartu ditzala; eta flotako irrati komunikazio sistemak berehala konpon ditzala. Azken horrekin lotuta, emisora askok azkenaldian ez dutela funtzionatzen salatu du Ekialdebuseko LABek, “horrek, arriskuan jartzen du langileen eta kontrol zentroaren arteko komunikazioa larrialdi egoeretan”. Hori horrela, komunikazio sistema guztiak une oro egoera ezin hobean egotea galdegin du, “larrialdien aurrean erantzun azkar eta eraginkorra bermatzeko ezinbesteko tresna delako”.

Gipuzkoako Foru aldundiko Mugikortasun departamentuari ere gin dio eskaera, Lurraldebus zerbitzu publikoaren arduradun izaeragatik. Ardura bere gain hartzea, “beste alde batera begiratzeari uztea eskatzen diogu. Garraio publikoa funtsezko zerbitzua da eta segurtasunari lehentasun osoa eman behar zaio”. Aldundiaren ardura dela segurtasun baldintza horiek betetzea esan du LABek, bai erabiltzaileentzat, baita langileentzat ere.

Plantilla benetan babestuko duten neurri guztiak martxan jartzea ere eskatu du sindikatuak, “prebentzio neurriak indartuta, segurtasun langileen presentzia handituta gatazkatsuenak diren lineetan, geralekuetan eta ordutegietan”. Neurri horiek, gainera, berehala indarrean jartzeko galdegin du, “tragedia bat gertatu aurretik”, eta erantzun irmorik gabe gelditzen den eraso bakoitza “porrot kolektiboa” dela azaldu du. Harago jo du, eta etorkizunean antzeko gertakariak izateko arriskua handituko dela esan du.

Indarkeria ez normalizatzera deitu du, bukatzeko: “Garraio publikoko langile baten kontrako eraso oro, zerbitzu publiko osoaren kontrako erasoa da. Egunero milaka pertsonaren mugikortasuna bermatzen duten langileek segurtasunez, errespetuz eta duintasunez lan egiteko eskubidea dute”.

Noticia publicada en Bidasoko HITZA, el lunes día 13 de Julio de 2026.

Jaiak

Bi asteburuko jai egitarau anitza izango dute Santiagon

Larunbatean, hilak 18, Santiago auzoko jaiak hasiko dira, eta Santiago Egunera bitarte, hamaika jarduera antolatuko dituzte.

Gorka Correyero Llamas

Irun

2026/07/13

Santiago Eguna iristear da, eta Santiago auzoko bizilagunak festa gosez dira. Aurtengo jaiek berritasun garrantzitsua izango dute: bi asteburukoak izango dira. Larunbat honetan hasita, hilak 18, Santiago Egunera bitarteko egitarau zabala antolatu dute auzotarrek. Datozen bi asteburutarako badute plana bertakoek, eta astean zehar ere hainbat jarduera egingo dituzte arratsaldeetan. “Jai hauek guztionak dira, eta denon artean handiak egiten ditugu”, adierazi dute jaien egitarauan. 

Ostiralean, 16:30ean, txupinazoa eta banderaren igoera egingo dute aurtengo santiagoei hasiera emateko. Arratsaldean zehar, haurrentzako zezen txikien entzierroa, olinpiadak zein buruhandiak izango dituzte. 20:00etan, Oihan Vegak auzoa girotuko du, eta olinpiaden afariaren ostean, bingoa egingo dute. Dj David ordu txikiak arte izango da musika jartzen, eta 02:00etan indarrak hartzeko makarroi jana egingo dute.

Igandea Mahai Tenis txapelketarekin hasiko dute. 12:00etatik hasita, herri kirolak izango dira eta hori amaituta, bermutarekin batera IGA abesbatzak kontzertua eskainiko du. Arratsaldean, berriz, mus txapelketa eta jolas herrikoiek plaza hartuko dute. Jaien lehenengo asteburuari amaiera emateko, 19:00etatik aurrera sardina jana egingo dute.

Astelehenetik ostegunera bitarte, arratsaldero jarduera ugari antolatuko dituzte auzoak jaien giroa gal ez dadin. Gainera, hilaren 22a, asteazkenarekin, haurren eguna egingo dute. 

Bigarren astebururako indarrak prest

Ostiral arratsaldean, hilak 24, haur eta Aldapako helduen danborrada handia egingo dute jaien asteburu handiari hasiera emateko. Astegunetan indarrak hartzeko tartea edukiko dute auzotarrek azken txanpara osorik heltzeko. Los Trankilos taldeak bolumena piztu eta gau pasarako gonbita egingo diete bizilagunei. Aurreko ostiralean bezala, 03:00etan makarroi jana egingo dute.

Santiago eguna festetako egun handia izango da. Goizean goizetik, txistulariek auzoa esnatuko dute dianaren bitartez. 12:00etan, Irungo Hiri Musika Bandak polkaren kontzertua eskainiko du. Arratsaldean, Santiagoko konpainiak patata tortilla txapelketa antolatuko du. 22:30etatik 00:30etara Burrunba elektrotxaranga auzoan barrena ariko da, eta 03:00etan amaierako traka egingo dute. 

Noticia publicada en Bidasoko HITZA, el lunes día 13 de Julio de 2026.

Kultura

Oiasso zaharra ezagutzeko aukera izango dute datozen egunotan

Gaur aurkeztu dute XVI. Dies Oiassonis jaialdia eta bihartik igandera bitarte, 50 jarduera inguru izango dira hiriko hainbat txokotan.

Gorka Correyero Llamas

Irun

2026/07/13

Irunek iraganera bidaiatuko du datozen egunotan, Oiassora, hain zuzen. Gaur aurkeztu dute XVI. Dies Oiassonis erromatar jaialdia, eta beste urte batez, Oiasso hiria ezagutzeko 50 jarduera inguru antolatu dituzte. Antzerkia, musika, gastronomia, artisautza eta jakinmina ez dira faltako. Gainera, aurtengo jaialdia oso berezia izango da Oiasso Museoaren 20. urteurrenarekin bat egiten baitu. Jarduerak hiriko hainbat txokotan egingo direnagatik ere, terma erromatarren ondoko plaza jaialdiaren ardatz izango da. Bertan, antzezlanak, bakarrizketak eta kontzertuak egingo dituzte, eta plaza jendez lepo egotea espero dute.

Jaialdiari hasiera emateko bihar, hilak 14, Jason y las furias antzezlana eskainiko dute Amaia KZn, 20:00etatik aurrera. Asteazkenean, berriz, urtez urte hainbeste jende biltzen duen azoka irekiko dute, eta igandera arte goiz eta arratsaldez zabalik egongo da. Ostegun gauean, Gladiator II filma eskainiko dute San Juan plazan. Publikoak adin guztietarako eskaintza zabala izango du eskura egunotan. Oiasso hiriaren ondare arkeologiko eta historikoa jai giroan eta modu dibulgatiboan azalduko dituzte hainbat jardueren bitartez.

Larunbata mugimendu handiko eguna izango da Irunen. 19:00etan Zabaltza plazatik hasita, Navigium Isidis desfilea egingo dute Dunboako zubiraino. Bertan, hiritar ugari bilduko dira, parte hartzaile zein ikusle. Gauean, berriz, Erromatar Zirkua egingo dute San Juan plazan, 21:00etan eta 23:00etan. Igandean ere hirugarren eta azken emanaldia egingo dute, 12:ooetan. Hona hemen, bihartik igandera bitarteko egunez eguneko egitaraua. 

Azkenik, aurten ere gastronomia presentzia handia izango du jaialdian. Irungo hainbat tabernarekin elkarlanean Pintxo Erromatarren ibilbidea egingo dute. Dagoeneko martxan da ibilbidea, eta taberna bakoitzak jaialdirako prestatutako pintxo berezia salduko du igandera arte. Pintxo guztiek Antzinako Erromarekin lotura dute, eta jaialdiaren baitan ostegunean egingo duten lehiaketan parte hartuko dute.

Noticia publicada en Bidasoko HITZA, el lunes día 13 de Julio de 2026.

Ingurumena

Energia eredua sendotzeko, 120.000 euro aldunditik Bidasora

Gipuzkoako Foru Aldundiko Jasangarritasun departamentuak eta Gipuzkoako eskualdeetako garapenerako hamar agentziek hitzarmena sinatu dute gaur, energia eredua sendotzeko.

Virginia Gil eta Jose Ignacio Asensio, gaur, hitzarmenaren sinaketa ekitaldian.Gipuzkoako Foru Aldundia

Oarso Bidasoko Hitza

Hondarribia,Irun

2026/07/13

Gipuzkoako Foru Aldundiko Jasangarritasun departamentuak eta Gipuzkoako eskualdeetako garapenerako hamar agentziek hitzarmena sinatu dute gaur, energia eredua sendotzeko. Zehazki, 2026 eta 2027 urteetarako da hitzartu den diru laguntza, eta Bidasoa Bizirik-ek urte bakoitzeko 60.000 euro jasoko ditu. Eskualdeetako energia planak indartzea; eta energia trantsizio bidezko, iraunkor eta herritarrengandik hurbil baterantz aurrera egiten jarraitzea du helburu aldundiaren ekarpen ekonomikoak. Bidasoari dagokionez Virginia Gil Bidasoa Bizirik-eko Zeharkako Proiektuen arduradunak sinatu du akordioa, Jose Ignacio Asensio Jasangarritasun diputatua izan delarik aldundiaren ordezkari. Osotara, 1,2 milioi bideratuko ditu aldundiak zeregin horietara, hamar tokiko agentzietako bakoitzari 120.000 euro emango dizkie bi urtean.

Jasangarritasun-diputatu Asensiok nabarmendu du hitzarmen horiekin egonkortasuna emango zaiela eskualdeen energia-plangintzari, “eta hurbiltasunean, erakundeen arteko lankidetzan eta pertsonekiko konpromisoan oinarritutako trantsizio energetikoko eredu bat indartzen dugu. Trantsizio energetikoa lurraldetik eraikitzen da, tokiko errealitate bakoitzera egokitutako irtenbideekin”.

Eskualdeko bakoitzeko agentziek hainbat lan ildo komun partekatuko dituzte, baina tokian-tokian konpromiso propioak ere izango dituzte. Hala, hitzarmenean jasotako gai komunak honakoak dira: udalekin elkarrizketa teknikoa izatea, eskualdeko energia-plangintza bultzatzea, Energiaren Eskualdeko Mahaiak dinamizatzea eta Energia Jasangarriaren eta Pobrezia Energetikoaren Gipuzkoako Lurralde Mahaian integratzea. “Gobernantza-eredu horrek administrazioen arteko jarduera koordinatua errazten du, ezagutza trukatzea errazten du eta lurralde bakoitzaren beharretara egokitutako erantzunak eskaintzea ahalbidetzen du”, zehaztu du Asensi0k

Bidasoa Biziri-ek, berriz, district heating, energia-komunitate eta trantsizio energetikoari buruzko proiektu pilotuak garatuko ditu enpresetan bere aldetik.

Noticia publicada en Bidasoko HITZA, el martes día 14 de Julio de 2026.

Kirola

59. Bidasoa Ibaiaren Nazioarteko Jaitsiera aurkeztu dute

Larunbat arratsaldean, Bidasoa ibaian adin guztietarako proba ugari antolatuko dituzte; eta eguna borobiltzeko, Urmuga kontzertua.

Gorka Correyero Llamas

Irun

2026/07/14

Santiagotarrak Kirol Elkarteak egutegian gorriz markatutako egunak ditu, eta horietako bat Bidasoa Ibaiaren Nazioarteko Jaitsieraren eguna da. Aurten, 59. edizioa egingo dute larunbatean, hilak 18, eta urtero legez, arratsalde osorako egitaraua antolatu dute. Parte hartzearen aldetik, aldaketak espero dituzte;  hala ere, urteotan izandako maila altuari eutsiko diote. Berritasun nagusia Urmuga kontzertua izango da, bertan hainbat artista bilduko baitira 20:00etatik aurrera. 

Bazkalostetik gauera bitarte hainbat jarduera antolatuko dituzte Santiagotarrak K.Eren instalazioetan. 15:00etan txikien txanda izango da, eta haiek ere Bidasoa Ibaiaren jaitsiera egiteko aukera izango dute. Bidasoa Txikiaren seigarren edizioa izango da, Faisaien Irlatik hasita. 17:00etan Nazioarteko Jaitsieraren irteera izango da, lehenengo irteera Villanuevako kurbatik izango da eta ordu erdi geroago San Migeleko eremutik. Bigarren irteerarekin batera, Jaitsiera Herrikoiari hasiera emango diote. 

“Orain arte izan ditugun berrikuntzak mantendu ditugu. Klubaren 60. urteurrena izanik, apustu berezia egin dugu sari gehiago sartzen eta oso eskertuta gaude Irungo komertzioek eman diguten bultzadarekin”, adierazi dute aurkezpenean. 

Maila handiko parte hartzea

“Aurten ibaia nahiko ur gutxirekin dator. Hortaz, dibertigarria izan daiteke lehia”. Parte hartzaileei buruz galdetuta, antolatzaileek adierazi dute gauerdira arte epea irekita dagoela. “Dakigunaren arabera,  momentuz 100 lagun inguruk izena eman dute. Espero dugu 250 parte hartzailetik gora biltzea”. 

“Izen handiak ez daude konfirmatuta baina parte hartzaileen interes handia dugu”. Aurkezpenean, interes handia duten kirolariak aipatu dituzte; zoritxarrez, argentinarrak ez dira etorriko. “Argentinarrak gurera etorri ez arren, Eider Cecilia Argentinan jokatuko den munduko txapelketan izango da”.

Duela aste gutxi batzuk, Cecilia Europako Txapelketan izan zen, eta bertan Munduko Txapelketarako txartela lortu zuen. Klubean pozarren dira azken urteotan izandako gorakadagatik. “Oso gogor ari naiz entrenatzen, eta entrenamenduek merezitako saria eduki dute: Munduko Txapelketarako sailkapena”, adierazi du Ceciliak. Datozen hilabeteetarako egutegi betea izango du kirolariak, eta datorrenari aurre egiteko prest dagoela baieztatu du.

Urmuga kontzertua

18:00ak aldera, Biriatuko ibai ertze inguruan Amets Arzallusek gidatutako ekitaldia izango da. 20:00etan, berriz, Et Incarnatus Orkestraren kontzertua antolatuko dugu klubaren instalazioetan hainbat artistekin batera. “Ezin dugu gehiegi aurretatu, sorpresa bat izango da eta espero dugu zuen gustukoa izatea”, nabarmendu dute. 

Noticia publicada en Bidasoko HITZA, el martes día 14 de Julio de 2026.

Gizartea

'Ibaia izena duen herrialde bat' lehiaketaren edizio berria, martxan

30 beherakoei zuzendutako arte digitalaren lehiaketa da, eta Bidasoako lurraldearen natura-ondareari balioa ematea du xede.

Gorka Correyero Llamas

Hondarribia,Irun

2026/07/14

Bidasoa-Txingudi Mugaz Gaindiko Partzuergoak Ibaia izena duen herrialde bat arte digitalaren lehiaketaren edizio berri bat martxan jarri du. 30 urtetik beherako gazteei zuzenduta dago, eta parte hartzaile bakoitzak Irungo, Hondarribiako eta Hendaiako lurraldearen natura-ondarea balioan jarri beharko du. Proiektuak arte digitaleko tekniken bitartez egindakoak izan behar dute, paisaia adierazgarri batean inspiratuta. Irabazleak 500 euroko saria izango du.

Dagoeneko interesdunek lehiaketaren gaineko informazio guztia dute Partzuergoaren webgunean. Urriaren 26ra bitarte, proiektuak aurkezteko denbora izango dute, alegia, lau hilabeteko epea izango dute Gipuzkoako Aldizkari Ofizialean argitaratu eta hurrengo egunetik hasita. Lanak posta elektronikoz bidali beharko dituzte, consorcio@bidasoa-activa.com helbidera. 

Proiektu guztien aukeraketa bat egitean, proiektu irabazlea Partzuergoaren webgune ofizialean argitaratuko dute. Gainera, lanen aukeraketa bat egingo dute eta Bidasoko Interpretazio Zentroan erakutsiko dituzte.

Noticia publicada en Bidasoko HITZA, el martes día 14 de Julio de 2026.

Gizartea

Elkarte feministek Berdintasun Plan berria egitea eskatu diote udalari

Bosgarren Berdintasun Planean alardearen auzia "kajoi batean sartuta" dagoela salatu dute elkarte feministek, eta Berdintasun Plan berri bat egitea eskatu dute.

Gorka Correyero Llamas

Irun

2026/07/14

Gaur, hilak 14, Irungo Emakumeen Etxea Elkarteak eta Txingudiko Elkarte Fenministak agerraldia egin dute, V. Berdintasun Planaren harira euren kezka adierazteko. Plan hori 2022an osatu zuten udalak eta hiriko eragileek, baina alkatetzak bere kabuz aldatu zuen Emakundera bidali aurretik. Orduan, hori salatzeko Arartekora jo zuten hiriko eragileek. Arartekoren erabakia aurkezteko agerraldia egin dute Istillaga plazan. Arartekoaren ebazpena garbia da: herri guztiek behar dutela Berdintasun Plana, udalek bultzatu behar dituztela berdintasun politikak, festetan ere emakumeek jasaten duten “bazterkeria” egoerekin bukatu behar dela, eta zehazki Alardearen kasuan emakumeen jasaten duten bazterketarekin bukatu behar dela. Arartekoaren ebazpen osoa ikusteko baliatu esteka hau.

Irungo Udalak hiriko eragile askorekin elkarlanean 2023-2027 epealdirako V. Berdintasun Plana osatu zuten 2022an. 2022ko urriaren 27an adostu zuten behin betiko hiriko eragileek, alderdi politiko gehienek eta udaleko langile eta teknikariek V. Berdintasun Plana. Alkatetzak, ordea, bere kabuz aldaketak egin zizkion Emakundera igorri aurretik. Iazko azaroan, Berdintasun Plan aldatu hori eraman zuen alkatetzak Berdintasun Mahaira han onartua izan zedin, eta handik udalbatzaren onarpenerako plenora eramateko; eragileek ez zuten alkatetzak bere kabuz eta eragileekin kontrasterik gabe aldatutako plan hori onartu; bai ordea 2022ko urriaren 27ko kontsentsuatu hura. Gauzak horrela, hiriko 21 elkarte feministak gaiaz duten euren kezka Arartekoaren aurrean aurkeztu zuten. Gaur eman dute Arartekoaren erantzunaren berri.

Hiriko 21 elkartek bat egin dute berriz ere, eta guztiek salatu dute oraindik ere, sanmartzialetan emakumeek ez dutela bermerik alardean parte hartzeko. “V. Berdintasun Planean Alardearen auzia oraindik ere ez dute aipatzen, kajoi batean sartuta jarraitzen du”, adierazi du Olga Rivasek, Txingudi Elkarte Feministako kideak. Izan ere, 2022ko urrian adostutako V. Berdintasun Planean Alardearen gaia jorratua bazen ere, alkatetzak egindako aldaketen ondorioz hura txostenetik ezabatu egin zen helburu nagusien atalean.

Berdintasun Plan baten helburua argia da: gizonezkoen eta emakumezkoen arteko berdintasuna lortzea. “Berdintasuna oinarrizko eskubidea izanik, uste genuen inor ez zela gai izango helburuak alde batera uzteko, baina udalak erakutsi du baietz”. Berdintasun Planean udalak eranskinen atalean aipatu du gaia, eta ez helburu gisa. “Eranskinetan Alardea aipatzeak ez du zentzurik, Berdintasun Plan batek helburu argiak behar ditu”. 

Gaiak duen larritasunaz kezkaturik Maribel Castellok, Irungo Emakumeen Etxea Elkarteko kideak, honakoa adierazi du: “Berdintasun Plana 2027an amaituko da, eta hori dela eta, beldur gara gaia kanpoan geratzeko arriskuan delako”. Udalari eskatu diote Berdintasun Plan berria sortzeko prozesua abiarazi dezala, “bosgarrenarekin ez baitugu eskatutakoa lortu”. 

“Orain arte ez dugu udalarekin hitz egiteko aukerarik izan, ez dute gaiari buruz ezertxo ere esan. Logikoena Berdintasun Batzordea eratzea zen, dokumentu honek bere garrantzia baitu”. Irunek, beraz, oraindik ere ez du plan onarturik. “Legeak behartzen du hiri eta herri guztietan Berdintasun Plan bat egon behar duela, eta oraindik ere Irunek plana izan gabe jarraitzen du”, adierazi du Castellok. 

Rivasek ere Castelloren hitzak nabarmendu ditu, eta hiri eredu bat sortzeko berdintasuna ezinbesteko ardatz bat dela gehitu du. “Hori gabe ez goaz inora, instituzioen aldeko leialtasun falta garbia da”. Arartekok bere erantzuna helarazi die 21 elkarteei, orain falta dena da Irungo Udalak gaiaren gaineko “erantzun argia” ematea. 

Noticia publicada en la página WEB irun.org, el martes día 14 de Julio de 2026.

La Policía Local detiene a tres varones sustrayendo elementos de un ciclomotor localizados mediante las cámaras de seguridad

14.07.2026

La Policía Local detuvo en la madrugada del sábado a tres varones tras ser localizados, mediante las cámaras de visionado en la Comisaría de Irun, sustrayendo elementos de un ciclomotor estacionado en la avenida Euskal Herria que el pasado martes también fue intento de sustracción. Los hechos ocurrieron pasadas las 05:30h y varios agentes se dirigieron al lugar, donde se observó, en unos arbustos, un bombín del arranque extraído.

Estas personas utilizaron un ciclomotor y un cuatriciclo, localizando en su interior las herramientas necesarias para realizar la extracción del bombín. Una vez detenidas las tres personas, los tres vehículos han sido trasladados al depósito.

Esta detención se enmarca en la colaboración entre la Policía Local de Irun y Hondarribia y la Ertzaintza tras varios episodios de sustracción de varias motocicletas en la comarca. El Ayuntamiento de Irun quiere poner en valor la colaboración y coordinación existente entre los diferentes cuerpos policiales, un trabajo conjunto que resulta fundamental para mejorar la eficacia de las investigaciones y reforzar la seguridad ciudadana.