Irungo Euskal Jira antolatzen duen batzordeak 2024ko Euskal Jira antolatzea erabaki du. Ordainketei eta Elkarteak dituen gastu arruntei aurre egiteko diru-arazoak gaindituta, Batzorde Antolatzailea berriz ere martxan jarri da, aurtengo Euskal Jirako jarduera-egitaraua prestatu ahal izateko.

Komunikatu baten bitartez, Batzordeak Euskal Jira jasaten ari zen egoera ekonomiko zaila ezagutzera eman zenetik jaso dituen babes adierazpen guztiei eskerrak eman nahi izan dizkie.

Finantzaketa

Bestalde, beharrezko finantzaketa lortu ahal izateko legezko prozedura aurkitzea oso zaila egin zaiela esan dute ere. “Oztopo legal gehiegi aurkitu ditugu, eta horiek luzatu egin dute aurtengo edizioaren prestaketen hasiera. Hain zuzen ere, oztopo legal horiek jartzen dute arriskuan Euskal Jiraren hurrengo edizioak ospatzea.

Jakin badakigu egoera horrek diru-iturri berriak bilatzera eta gure jaiaren bideragarritasun ekonomikoa bermatzeko gasturik garrantzitsuenetako batzuk ahalik eta gehien egokitzera eraman behar gaituela”, esan dute.

Diru iturri eskasak

Aldi berean, Batzordeak ilusiorik handienarekin egingo diola aurre aurtengo Jira antolatzeari adierazi du, baina ohartu dute “Udalak ez baduela mekanismorik bilatzen, nolabait, txosnan diru-sarrera faltagatik gerta daitezkeen galera ekonomikoez arduratzeko”, ezin duela ziurtatu hori egiten jarraituko duenik hurrengo edizioetan. Zentzu horretan, azken 25 urteetan, gutxienez bi aldiz Euskal Jirak egungoak baino arazo ekonomiko handiagoak izan dituela jakinarazi dute, eta bi aldietan Udalak aurrera egiteko behar zuen estaldura ekonomikoa eman ziola. “Oraingoan, tamalez, hori ez da horrela gertatu”, deitoratu dute. Hala eta guztiz ere, Udalaren laguntzarekin, Euskal Jiraren etorkizuna ziurtatzeko formula aurkituko dutela pentsatu nahi dute.