Koronabirusari aurre egiteko sektore ezberdinetako langileek egindako «lan ikaragarria» txalotu du Elkarrekin Podemos-Ezker Anitza taldeak. Mozioan, bi eskaera erregistratu dituzte.
Elkarrekin Podemos-Ezker Anitza udal taldeak mozio bat erregistratu du gaur, pandemian zehar funtsezko zerbitzuei eutsi dieten pertsonak aitortzeko asmoz. «Orain inork ez du zalantzan jartzen zerbitzu publiko indartsuak eta beharrezko baliabideekin ondo hornituak izatea funtsezkoa dela bizitzarako», esan dute taldekoek.
Medikuak, erizainak, elikagaien sektoreetako langileak, egoitzetako langileak, garbiketako langileak, zainketen sektoreko langileak, irakaskuntzako langileak, apal betetzaileak, kutxazainak, banatzaileek… Guzti hauen «lan ikaragarria» txalotu nahi izan dute. Halere, funtsezko zerbitzu horietako gehienak sektore feminizatu eta prekarizatuetakoak direla salatu du taldeak, eta gizarte aurreratura heltzeko funtsezko zeregin horiei garrantzi handiagoa eman behar zaiola nabarmendu dute.
Bi eskaera zuzen egin dizkiote udal gobernuari. Lehenik, hiriko leku sinboliko batean plaka bat jartzeko eskaera egin diote taldetik, «koronabirusaren pandemian zehar bizitzari eusteko funtsezko zerbitzuak mantendu dituzten pertsonal aintzatesteko». Bestalde, irundar guztien segurtasuna, osasuna eta ongizatea bermatzeko lan egin eta lan egiten duten pertsona guztiak omentzeko proposamena egin diote udal gobernuari.
No hay comentarios:
Publicar un comentario