Santi Jimenez, Hezkuntzako, Gazteriako, Lankidetzako eta Memoria Demokratikoko ordezkaria. / Irungo Udala

Santi Jimenezek Hezkuntza eta Gazteria arloen ardura hartu zuen bere gain joan den abenduaren 10etik, baita Garapenerako Lankidetza eta Memoria Historikoa arloena ere. Gaur azaldu du zein izango diren helburuak bere kudeaketa-arloetan, eta nola egungo osasun-larrialdiak eta gehien kaltetutako sektoreei erantzuteko beharrak, sozialki zein ekonomikoki, udalerrian planteatutako lan-ildoak berrikustera behartu duen.

Jimenezek azaldu duenez, Hezkuntzan familiekin harreman zuzena izatea izan da lehenengo gauza: «Guraso-elkarteekin eta eskola-kontseiluekin bilera bat egitea izan da lehenengo ekintza, hiriko ikastetxeen egoeraren ebaluazioa egiteko, eta, horrela, jakinarazten zaizkigun beharretan jardun ahal izateko. Uste dut lehentasunezko zatia dela arloan lanean hasteko orduan».

Ordezkariak adierazi duenez, 2020-2021 ikasturteko hasiera horren hondarretako bat ikastetxeek zituzten espazio-beharrei erantzuteko beharra izan zen «orduan proposatu genuen lan-mahaiak sortzea, udal-politikatik espazio publiko berrien lagapena errazteko. Alde horretatik, uste dugu oso garrantzitsua dela hezkuntzako profesionalen beharrei erantzutea, irakasle zein irakasle ez direnen beharrei. Saiatuko gara eskolakontseiluei protagonismo handiagoa ematen Hezkuntza arlotik hartzen diren erabakietan.»

Agintaldi honetarako planteatu duen beste helburuetako bat da 0 eta 3 urte bitarteko haurren hezkuntza-eskaintza indartzea, baita beste arlo batzuekin lan egitea ere, berdintasunean, eskola-jazarpenean eta beste gai askotan zeharkako neurriak ezarriz. Jimenezen hitzetan, Gazteria arloak «merezi duen garrantzia izan behar du, haurtxokoak, jarduera soziokulturalak eta ahalduntzea zabaldu eta hobetuko ditugu, jarduteko gaitasuna duen arreta-bulego fidagarri baten bidez». Beste erronka bat da gazteentzako jarduerak dinamizatzen lan egiten duten kolektibo guztiei balioa ematea, eta, jakina, Irun Haurren Lagunen Hiri gisa finkatzea eta gazte-ekipamenduak zabaltzea, CBAren 2. fasea eta Martindozenean erabilera berriak sustatuz.

Memoria Demokratikoaren lehentasuna da lehenbailehen abian jartzea hirian Memoria Demokratikoaren bulegoa, lotura bat izan dadin bere arbasoak edo frankismoan errepresaliatutako pertsonak berreskuratu nahi dituen jendearentzat. «Gainera, hirian Memoria Demokratikoaren azterketa martxan jarriko da. Gure taldeak proposatutako zuzenketa izan zen, gainerako udal-taldeek berretsia.», esan du Santi Jimenezek.

Lankidetza

Amaitzeko, Lankidetza politikei buruz hitz egin du ordezkari berriak: «Aberastasunaren banaketaren eta herrialde behartsuenekiko lankidetzaren garrantzia kontuan hartuta, funtsezkoa da ulertzea gizakiok elkar behar dugula, eta elkartasuna funtsezko faktorea da gai honetan. Lankidetzari %0,7 eman ahal diogu, baina hortik harago, garrantzitsua da garapenaren alde lankidetzan diharduten erakunde guztiei laguntzea, eta %1era zabaltzen saiatuko gara».

Gainera, esan du funtsezkoa izango dela arrazoi sozial edo politiko desberdinengatik beste herrialde batzuetatik datozen pertsonei harrera egiteko leku bihurtzea Irun.